Сестринские молебны проходят по воскресным дням в храме Преображения Господня в Тушино после окончания ранней Литургии. Начало молебна приблизительно в 9-00 часов.
МОЛИТВЫ ЧТОМЫЕ НА МОЛЕБНЕ
Призри, Владыко, Человеколюбче, милостивым Ти оком на рабов Твоих: сестер и братьев нашей группы милосердия
и услыши моления наша с верою приносимая, яко Сам рекл еси: вся елика молящеся просите, веруйте, яко приимете, и будет вам, и паки: просите и дастся вам: сего ради и мы, аще и недостойнии, уповающее на милость Твою, просим: подаждь благость Твою, рабом Твоим сестрам нашим …
и исполни благая желания их, мирно же и тихо в здравии, и долгоденствии вся дни их соблюди: рцем вси, скоро услыши и милостивно помилуй.
Еще молимся Господу нашему, о еже призрети на младенцев и отроков сих, и низпослати в сердца, во умы и во уста их духа премудрости, разума же и благочестия и страха Своего, и просветити их светом Своего богоразумия, и подати им силу и крепость, во еже скоро прияти, и спешно навыкнути Божественнаго закона Его наказанию, и всему благому и полезному учению: еже преуспевати им премудростию и разумом, и всеми благими делы в славу пресвятаго Его Имене, и даровати им здравие, и долголетны их сотворити к созиданию и славе Церкве Своея, рцем вси, Господи, услыши и милостивно помилуй.
Врачу душ и телес, со умилением в сердце сокрушенном к Тебе припадаем, и стеняще вопием Ти: исцели болезни, уврачуй страсти душ и телес рабов Твоих младенцев и отроков, немощных и в болезни сущих, юных и старых, окормляемых сестрами нашими, и прости им яко благосерд, вся прегрешения, вольная и невольная, и скоро воздвигни от одра болезни, молимтися услыши и помилуй.
Аще молимся Тебе, Господу Богу нашему, еже услышытися глас моления нашего, и молитв, и помиловати рабов Твоих: (имярек):
благодатию и щедротами твоими, и исполнити вся прошения их, и простити им вся согрешения вольныя и невольныя: благоприятным же быти мольбам и милостыням их пред престолом Величествия Твоего, и покрытии их от враг видимых и невидимых, от всякия напасти, беды и скорби, и недугов избавити, и подати здравие с долгоденствием: рцем вси, Господи, услыши и помилуй.
МОЛИТВА О НИСПОСЛАНИИ ЛЮБВИ К СТРАЖДУЩИМ
Господи, Иисусе Христе, Сыне Бога Живаго, Агнче Божий, вземляй грехи мира, Пастырю добрый, положивый душу Свою за овцы Твоя, Небесный Врачу душ и телес наших, исцеляяй всякий недуг и всякую язву в людях Твоих! Тебе припадаем, помози нам, недостойным рабом Твоим. Призри Многомилостиве, на делание и служение наше, даждь нам быти верными вмале послужити болящим, Тебе ради, носити немощи немощных и не себе, но Тебе единому угодити во все дни живота нашего. Ты бо рекл еси, о Сладчайший Иисусе: понеже сотвористе единому от сих братий Моих меньших, Мне сотвористе. Ей, Господи, суди нам грешным, по сему глаголу Твоему, яко да сподобимся творити благую волю Твою во отраду и утешение искушаемых, недугующих раб Твоих. Низпосли нам благодать Твою, попалящую в нас страстей терние, призвавый нас, грешных, на дело служения о Имени Твоем; без Тебе не можем творити ничесоже: посети и искуси сердца наша внегда стояти нам у возглавия болящих и низверженных; уязви души наша Твоею любовию, вся терпящею и николиже отпадающею. Тогда бо возможем, Тобою укрепляемии, подвигом добрым подвизатися и веру соблюсти, даже до последняго нашего издыхания. Ты бо еси источник исцелений душевных же и телесных, Христе, Боже наш и Тебе, славу и благодарение возсылаем, ныне и присно и во веке веков. Аминь.
Молитва ко святым преподобномученицам
Великой Княгине Елисавете и инокине Варваре
О святые новомученицы Российския, Великая Княгине Елисавето и сестро ея крестовая, пречестная инокине Варваро, купно путь свой во мнозех муках скончавшия, Евангельския заповеди делом во обители Милосердия совершившия, веры ради Православныя подвизающися до смерти и добрый плод в терпении страстей Христу принесшия! Молитеся Ему, яко Победителю смерти, да утвердит Церковь Русскую Православную и Отечество наше, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда наидет на ны испытания час, мужества дар воспримем вашими молитвами, отвергшеся себе и вземше крест свой, последуем Христу, распинающе плоть свою со страстьми и похотьми. Сохраните нас от всякого зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, да радующеся воздадим хвалу, честь и поклонение Отцу и Сыну и Святому Духу во веки веков. Аминь.